G7: Çin asılılığını azaltmaq planı.

Sammit çərçivəsində ən çox müzakirə olunan iqtisadi mövzulardan biri ABŞ administrasiyasının kritik minerallar üzrə yeni ticarət mexanizmi yaratmaq təşəbbüsüdür.

Vaşinqton hesab edir ki, kobalt, litium, qrafit, volfram və nadir torpaq elementləri kimi strateji xammalların istehsalı və qiymətləri üzərində Çinin dominant mövqeyi Qərb iqtisadiyyatları üçün ciddi risk yaradır. ABŞ vitse-prezidenti Cey Di Vens tərəfindən irəli sürülən təşəbbüs Qərb ölkələrinin Çin asılılığını azaltmasını nəzərdə tutur.

Lakin Reuters-in məlumatına görə, Avropa ölkələri və bəzi G7 tərəfdaşları planın bir sıra elementlərinə skeptik yanaşırlar. Xüsusilə, ABŞ Müdafiə Nazirliyinin süni intellekt əsaslı qiymət modeli vasitəsilə minerallar üçün qiymət mexanizmi müəyyənləşdirmək təşəbbüsü Avropa paytaxtlarında narahatlıq doğurub.

Avropa rəsmiləri hesab edirlər ki, qiymətlərin müəyyənləşdirilməsi prosesində tək bir ölkənin texnoloji modelindən istifadə bazarda qeyri-bərabər təsir yarada bilər. Bunun əvəzinə Avropa İttifaqı daha şəffaf və çoxtərəfli idarəetmə mexanizminin yaradılmasını təklif edir.

Mədən sənayesində də fikir ayrılığı müşahidə olunur. Bir sıra iri şirkətlər qiymət tənzimlənməsinin əleyhinə çıxaraq vergi güzəştləri və investisiya təşviqlərinin daha effektiv vasitə olduğunu bildirirlər.

© 2026. Politic Signal