Tramp İsrailin Beyruta zərbəsini tənqid edir. İran isə qalib gəlir?

ABŞ Prezidenti Donald Tramp İsrailin Livanın paytaxtı Beyrutun cənub ətrafına endirdiyi hava zərbəsini tənqid edib və bildirib ki, bu addım Vaşinqton ilə Tehran arasında müzakirə olunan sülh sazişinin yekunlaşdırılması prosesini çətinləşdirə bilər. Bununla belə, o, tərəflərin razılığa çox yaxın olduğunu vurğulayıb. Tramp "Truth Social" platformasında paylaşdığı açıqlamada Beyruta edilən hücumun belə həssas məqamda baş verməsinin düzgün olmadığını bildirib. “Bu səhər Beyruta edilən hücum baş verməməli idi, xüsusilə də İranla sülh sazişinə bu qədər yaxın olduğumuz bir gündə”, – deyə ABŞ prezidenti qeyd edib. Onun sözlərinə görə, bölgəyə, o cümlədən Livana sabitlik gətirəcək razılaşmanın əldə olunmasına çox az qalıb və bütün tərəflər gərginliyi artıracaq addımlardan çəkinməlidirlər.

İran nümayəndə heyətinin üzvü Məhəmməd Baqir Qalibaf isə İsrailin Beyrutun cənub məhəllələrinə endirdiyi zərbənin ABŞ-ın öhdəliklərini yerinə yetirmək iradəsinə və imkanlarına dair ciddi suallar yaratdığını bildirib. İsrail ordusu hücumun İranın dəstəklədiyi Hizbullah hərəkatının mövqelərini hədəf aldığını açıqlayıb. Qalibaf sosial şəbəkədə paylaşdığı açıqlamada bildirib ki, əgər tərəflər üzərlərinə götürdükləri öhdəlikləri yerinə yetirmək iradəsinə malik deyillərsə, danışıqlar prosesinin davam etdirilməsi çətinləşə bilər.

İran Silahlı Qüvvələrinin Birləşmiş Qərargah rəisinin müavini Məhəmməd Cəfər Əsədi də İsrailin Beyrutdakı əməliyyatlarının cavabsız qalmayacağını bəyan edib. Daha sonra İran parlamentinin Milli Təhlükəsizlik Komitəsinin rəhbəri də “güclü cavabın yaxınlaşdığını” bildirib.

Vasitəçilər nikbindir

Donald Tramp və danışıqlarda vasitəçilik edən Pakistan hökuməti şənbə günü açıqlamalarında ABŞ-İran sazişinin bazar günü imzalana biləcəyini bildirmişdilər. Danışıqlarda iştirak edən rəsmilərdən birinin sözlərinə görə, vasitəçilər razılaşmanın yekun mərhələyə çatdığına və yaxın zamanda tamamlanacağına inanırlar. Kremlin yaydığı məlumata əsasən, Tramp bazar günü Rusiya Prezidenti Vladimir Putinlə telefon danışığı zamanı da sazişin əldə olunmasının yaxın olduğunu qeyd edib. Lakin Tehran Beyruta zərbə endirilməzdən əvvəl də sənədin imzalanma vaxtı ilə bağlı ehtiyatlı mövqe nümayiş etdirirdi və yekun tarix barədə qəti açıqlama vermirdi.

"Reuters" xəbər agentliyinin əldə etdiyi məlumata görə, razılaşdırılması nəzərdə tutulan sənəd çərçivəsində ABŞ İrana məxsus dondurulmuş 25 milyard dollar həcmində vəsaitin sərbəst buraxılmasına razılıq verə bilər. Bunun müqabilində İran nüvə silahı istehsal etməmək və belə silahlar əldə etməmək öhdəliyi götürəcək.

Mənbələrin bildirdiyinə görə, tərəflər arasında yekun saziş əldə olunacağı təqdirdə İranın nüvə proqramı, iqtisadi sanksiyalar və regional təhlükəsizlik məsələləri üzrə daha geniş danışıqların aparılması nəzərdə tutulur.

Müşahidəçilər hesab edirlər ki, İsrail-Hizbullah qarşıdurmasının davam etməsi və Livanda baş verən son hadisələr ABŞ-İran danışıqlarının gələcək taleyinə təsir göstərə biləcək əsas amillərdən biri olaraq qalır.

© 2026. Politic Signal